U saobraćajnoj nesreći koja se dogodila danas, nešto poslije 13 časova, poginuo je vozač kamiona Ahmet Jahdadić (62) rodom iz Plava, koji je upravljao kiperom marke “MAN” budvanskih registarskih oznaka.

Nesreća se dogodila u Hercegnovskoj ulici na Seljanovu, kada je on izašao iz kamiona, a vozilo krenulo nizbrdo. Nesretni vozač pokušao je da uskoči u kamion i zaustavi ga, što, nažalost, nije uspio, pa ga je vozilo pregazilo, piše portal Radio Tivat.

Kamion je nastavio da se kreće nizbrdo, udario je nekoliko vozila, a na kraju ulice se zaustavio, teško oštetivši parkirani automobil i oborivši betonski zid i ogradu jedne od kuća.

Iako se na licu mjesta odmah pojavila ekipa Hitne pomoći Tivat, teško povrijeđenom vozaču nije bilo spasa.

Istraga je u toku, a na mjestu nesreće su i tivatski vatrogasci, kao i gradonačelnica Tivta Snežana Matijević.

CDM.me